政情：工專聯查兩電鬧分歧
經濟動力同自由黨呢對冤家，早前同專業會議、商界黃宜弘等人，成立咗工商專業聯盟（工專聯），希望達到「協同效應」以壯大聲勢，但點知大家一去到政策層面議題，雙方分歧就即時現晒形。好似最近立法會要求用《立法會（權力及特權）條例》（特權法）徹查兩電加電費開天索價事件，自由黨講明話要查，但經濟動力就話唔可以查，以致立場不一致。
工專聯成立後，大家對佢哋都有好大期望，諗住佢哋磨合一段時間後，可以組成全港最大嘅工商黨，但點知磨咗幾個月，磨出嘅係矛盾裂痕。自兩電公布要大幅加電費後，惹來各界強烈不滿，而身兼立法會內務委員會主席嘅自由黨主席劉健儀，亦將於二月八日大會上提出動議，表決是否動用特權法，就兩電加價一事向兩電索取機密資料。
自由黨前日向傳媒吹風，講明支持用特權法徹查事件，但會修訂字眼，例如屬機密或敏感嘅商業資料，就唔使向立法會披露。咁樣修訂法，睇怕查完都查唔出啲乜嘢，但估唔到連呢條無牙力嘅修訂，經濟動力都唔肯支持。
經濟動力召集人林健鋒話，中電同港燈都算係私人公司，如果吓吓都用特權法呢把尚方寶劍，工商界會好擔心郁啲就畀人查，所以工商界意見好清晰，就係唔支持用特權法。不過，問題在於自由黨同經濟動力都話自己為工商界及中小企發聲，理應立場一致，但今次徹查兩電事件，雙方立場大纜都扯唔埋，唔通香港有兩個工商界？
取向不同難達共識
有局外人就分析，自由黨要部署立法會地區直選，如果反對徹查兩電，選舉期間實畀泛民主派咬住唔放，亦好難向選民交代。相反經濟動力留喺功能組別，其選民只係商家，自然要向商界及中小企交代。
呢個「不能合作」嘅簡單邏輯，其實佢哋兩班人都好明白，佢哋肯放低身段成立工商專業聯盟，都係諗住自己可以食住對方，繼而慢慢壯大自己聲勢。
不過，事實係大家唔肯妥協，只堅持自己立場，咁究竟個聯盟有乜作用呢？唔通淨係去維園搞年宵攤檔？