政情:福建幫逆戰 搵許副參選

立法會港島區一直係兵家必爭之地,今年由原本六席增加到七席,令各大黨派都蠢蠢欲動想派人爭奪。據聞喺北角區擁有龐大勢力嘅福建幫都想收復失地,要贏番○八年選舉中失去嘅議席,初步有意推舉棄商從政嘅民政事務局副局長許曉暉(Florence)參選,首當其衝將會係一直密謀取得兩席嘅民建聯(民記)同新民黨,斷送兩黨第二梯隊入局嘅機會。

香港有超過一百萬福建鄉親,當中有唔少鄉親都聚居北角,令北角有「小福建」嘅稱號,祖籍福建嘅現任港區全國人大代表蔡素玉(蔡菜子),喺二○○○年同○四年兩屆立法會選舉中,都喺福建幫支持下成功當選,令佢喺立法會八年期間儼如福建幫嘅代言人。不過,蔡菜子喺○八年立會選舉因為建制派分票不均,最終輸咗畀當時嘅公民起動何秀蘭,無緣入局。

據聞福建幫對冇咗代言人呢個結果一直耿耿於懷,同時福建幫過去一直幫民記「抬轎」,亦未見民記有乜投桃報李,唔少福建幫中人都反問,既然福建幫有足夠實力點解唔自立門戶派人參選呢?我哋收到消息,福建幫數名骨幹人物,最近就係咪派人參選進行可行性研究,經過千揀萬選後認為最理想人選係加入政府多年,而且有一定知名度嘅Florence。

如意算盤難敲響

不過,有知情人士分析,福建幫呢個如意算盤未必咁易打得響,因為福建幫呢個想法仲停留喺空中樓閣階段,分分鐘連Florence呢位當事人都未知情,其次要Florence離開政府走入直選舞台並非容易,既要放棄喺政府每月十幾萬人工同福利,同時瞓身做地區工作,亦需要好大勇氣同承擔,淨係要佢減少時間陪兩個囡囡,相信係一個好艱難嘅決定。

至於從整體政治局勢考量,民記同新民黨都想染指兩席,福建幫突然有意自行推舉代言人參選,勢必斷送民記同新民黨第二梯隊入局嘅機會,究竟建制派呢場暗戰中會否畀人坐享漁人之利,就要睇佢哋內部點拆解喇。

第一手消息請下載on.cc東方互動iPhone / iPad / Android Apps
Money18免費即秒股票報價網站現推出8升級功能,財經資訊,實時實發!