處於黃金心臟地段，斥資逾五十億打造的添馬艦政府總部，除了「門常開，菌湧來」，搖身變成「毒廈」淪為國際笑柄外，又再爆醜聞——政府涉嫌因趕工及趕入伙，懶理電訊商警告，結果導致訊號勁弱，有啲樓層根本無辦法使用手機！
真係怪事年年有，夕陽政府臨收工特別多！老朽想起多次在太空行走嘅俄羅斯太空人根納季．帕達爾卡講過：「人們已經發現了其他像太陽系那樣的星系，但到現在為止，我沒有見過外星人，也沒有外星人到過太空站；如果要找奇怪的現象，還是在地球上找吧。」
我們在地球上，果然找到了煲呔曾呢個奇人！「門常開」的「穿心煞」設計，政府「冇心」竟畫公仔畫出腸，「門」雖常「開」，無奈煲呔曾畀人嘅感覺，即使佢大嗌話「要做好份工」，可是「無心政府」，就算大鑼大鼓，點扮勤力，畀市民嘅感覺，頂多係武大郎捉姦——有心無力！何況家陣真係「冇心」添！
文字風格可見作家表達嘅唔同境界，同樣，建築物嘅設計亦可反映主政者嘅不同心態。同文講得啱：正所謂物似主人形，有怎樣的特首，也就有怎樣的總部，只有空心老倌才會打造空心樓閣。煲呔曾治港，有心冇心，不必多講矣。
「門常開」嘅設計意念，據講係「寓意政府以開放、透明及廣納民意嘅態度」，空心怎裝載民意？今高官人人自危，排隊避毒放假，再加上「聽唔到」，一於靜心等收工，hea到最後一秒鐘！