退而不休，想做香港民主派共主又做唔成嘅前政務司司長、「民主阿婆」陳方安生又出嚟搞搞震，尋日趁住泛民搞特首參選人初選，同埋幾舊本港政界舊電池一齊出嚟，美其名係幫手宣傳，實則咪又係不甘寂寞，抽水爭取曝光，以免市民唔記得佢之嘛！
阿婆尋日朝早投票開始冇耐，就去到灣仔港鐵站外面嘅票站，話咁做係以示支持喎。不過支持唔係靠把口嘅，佢去到票站時冇投到票，一時又話人太多、票站太公開，一時又話自己一定會投o架，總之就藉口多多，係都唔肯投出自己一票。
呢啲咪名副其實「搞搞震、冇幫襯」囉！市民如果想投票，都係企喺街邊投o架啦，唔通民主阿婆以為全香港市民都好想知佢投畀邊個？唔通仲以為自己好有影響力，仲可以影響到「選情」咩？如果係咁，佢就真係諗多咗喇！