政情：新民黨慶周年 嶽曲噩夢
尋日係新民黨一周年黨慶，食物及衞生局局長周一嶽都嚟助興，又再唱歌。
現場所見，雖然佢無大走音，但佢揀咗《沉默是金》同《All I Have to Do Is Dream》兩首歌，就完全係佢嘅心聲嘞。喺唱《沉默是金》前，周一嶽隨口講：「我哋成日都係咁o架啦！」而首英文歌，咪就反映佢成日喺度發夢囉。佢着住一套粉紅色嘅唐裝衫，新民黨副主席田北辰同佢着一式一樣嘅衫，仲要同佢一齊「發夢」。
講番全城鬧爆嘅D&G事件，新民黨葉劉淑儀話D&G啲衫要身材好先可以着得落，所以自己一直唔係D&G嘅粉絲。不過葉太都認為啲保安無禮貌，仲話以後都唔會幫襯喎。
前排話自己有意選特首嘅葉太，雖然已經喺特首選委投票後打退堂鼓，但尋晚唐、梁兩營唔少嘅支持者都有出席。佢一於擸晒兩面嘅支持者坐喺主家席，尋晚唐、梁嘅支持者，都變晒佢嘅嘉賓。