政情：陳繁昌60大壽送公式杯
近百名來自世界各地嘅數學專家日前雲集於沙田一間酒店，原來係嚟慶祝科技大學校長陳繁昌嘅六十歲大壽，出席嘉賓唔少都係數學界殿堂級學者，仲有香港大學校長徐立之同科大校董會主席張建東等。
○九年上任科大校長嘅陳繁昌，曾經喺美國耶魯大學、加州大學洛杉磯分校擔任數學系教授，曾指導六十多位博士生及博士後研究員，可以話係桃李滿門，一班學生日前就特登幫佢搞咗個生日派對。
當日場面非常熱鬧，陳繁昌一班老朋友，成晚細訴那些年，陳校長睇番舊相時仲感動到眼泛淚光。成晚高潮所在係陳校長首次粉墨登場，拎番幾十年前支結他，自彈自唱《My Way》等英文老歌。為咗答謝有朋自遠方來，佢特製咗百幾隻紀念杯送畀賓客，上面寫咗四條佢自創嘅公式，啲公式已被科學界廣泛採用。至於生日願望，佢就話希望科大有一日可以出產一位校友，好似蘋果創辦人喬布斯咁貢獻社會。