政情：毒廈開餐 卿姐話咪搞
添馬艦「門常開」建築群爆出退伍軍人症桿菌播毒危機，煲呔曾同多達七名局長嘅私人廁所都有惡菌出沒，但煲呔曾並無提高警覺，如期邀請立法會議員喺下周五參觀新政府總部同喺裏面餐廳食飯。
立法會行政管理委員會成員劉慧卿就似乎信唔過政府總部嘅消毒程序，要求改番喺禮賓府食飯，依家等緊政府進一步回覆。
卿姐尋日同傳媒聚會，再次炮轟今次退伍軍人症恐慌，認為一定要徹查及追究責任，行管會下周二就會開會問責。卿姐又話，自己一早定咗喺明日帶班瑪利曼書院校友參觀立法會新大樓，後來爆發疫症危機，累佢要逐個校友問吓佢哋驚唔驚染病，好彩大家都話唔擔心，先至可如期成行。
對於議員醫肚嘅立法會宴會廳廚房亦驗出有菌，卿姐就對立法會嘅消毒工作好有信心，話一開番就會去幫襯番。但其實立法會嘅消毒工作，同政府總部一樣都係由建築署委託外判承辦商做嘅，卿姐咁心急返宴會廳開餐，莫非佢唔怕有風險？