政情：棠哥退休?聽住先
工聯會喺今屆區議會選舉創出佳績，贏咗足足三十席，前排又傳佢哋想全面進軍立法會，喺超級區議會議席及全港五大區都派人出選，加上三月特首又換屆，喺種種不明朗因素下，工聯會理應以不變應萬變，但會長鄭耀棠尋日同傳媒聚會時竟然話嚟緊四月好想退休、不再續任。呢個消息一出，大家都半信半疑，普遍都話信住先啦，事關唔係棠哥想退就退。
自稱年紀大機器壞
工聯會領導層每三年就會換屆一次，會內規定會長同理事長兩個高層職位，同一個人唔可以連續做多過三屆。雖然棠哥做咗兩屆會長，但佢自稱因為年紀已經六十三歲，加上曾經因為頸椎問題大病一場，所以今屆退下來嘅意欲相當強烈。在場記者聽完，仍然抱住懷疑態度，棠哥有見及此，即時話：「到四月睇過點囉！」
工聯會喺政壇影響力唔細，會員人數已突破三十六萬，要領導咁大個組織，真係少啲威望同能力都唔得。棠哥喺內地搭通晒天地線人所共知，但佢話，同中央關係好，未必係做會長嘅必要條件，最緊要係心繫勞工咁話。雖然棠哥好似去意已決，但佢亦留有後路，承認自己實際上未夠期，即使做多三年都冇違反內部規定喎。
所以話啫，棠哥話退休，大家都係聽住先，事關工聯會係老牌愛國愛港團體，中央肯唔肯畀棠哥退休都係未知數。不過咁，工聯會嘅換血制度真係值得一讚，棠哥仲話，四月會研究埋唔畀副會長或副理事長做多過三屆，而且退落嚟後亦唔可以做會務顧問之類嘅虛銜，簡單啲講係要「裸退」，其他政黨真係要好好學習，唔好戀棧權位，讓新人上位。
特首選舉已進入埋身肉搏階段，工聯會嚟緊二十日都搞咗個「雙英」論壇，棠哥講到明唔會請泛民參選人。佢又強調，工聯會決定「謀定而後動」，即係到二月十四日提名期前都唔會表態，亦唔講提名及投票意向，即使畀人覺得「吊高嚟賣」都冇計，因為工聯會唔敢輕舉妄動喎。