新年伊始，總祈望有好兆頭，「輕寒時節牡丹開，葉底青青又見梅」；好衰唔衰，花開富貴唔見，雞瘟臨城，禽流感又殺到埋嚟至真，又話再變種，疫苗恐失效，你都咪話唔驚！仲有更攞命嘅係添馬艦政府總部及立法會綜合大樓——又淪為惡菌疫區，夕陽政府，難道真係要衰收尾？
「門常開，惡菌湧進來」，煲呔曾為了在新立法會大樓宣讀最後一份《施政報告》，一味趕工，倉卒入伙，結果欲速則不達，搞到後患無窮。有傳染病專科醫生就質疑，政府總部竟然有九處地方都發現退伍軍人症桿菌，根本就係連替供水系統徹底消毒嘅基本工作都未做好就入伙！
政府總部唔通遲些才「門常開」都唔得？如今趕工趕出菌患無窮；大樓至今話就話近乎全面入伙，之不過，據稱至今仍在趕忙、執漏；灰塵、天拿水味四處充斥，部分公務員爆發皮膚敏感。
此外，由於趕入伙，就連基本嘅滅蟲滅鼠工作都未做好；一幢逾五十億元興建的「門常開」搞成咁，淪落到成惡菌病疫溫床，政府管治有幾叻，又幾「強政勵治」，市民唔係單眼佬都一眼睇晒啦！
夕陽政府管治一無是處，基層搵朝唔得晚，家陣連中層也忍無可忍，被迫上街，民怨沸騰，確已達到臨界點！如今，要是社會又爆發瘟疫惡菌，咁就大鑊。小市民窮，頂多呻運滯，若是連呼吸也怕冇命，唔該煲呔曾提早腳趾尾痛下台！