政情:張炳良與行會說再見

夕陽政府快將收檔,取而代之係新一屆政府,連帶作為「橡皮圖章」嘅行政會議會換班底。行會非官守成員張炳良就話,自己已經做咗七年行會,「要吸收嘅經驗有喇,要畀(政府)嘅角度有喇」,係時候讓畀其他人做咁話。張炳良講到咁實牙實齒,睇來下屆行會未必會見到佢喇,但佢會否繼續從政就仲係未知數。

尋日電台播咗張炳良嘅錄音訪問,除咗交代唔再做下屆行會成員外,仲臨別依依提醒啲特首參選人,雖然好多人期望新特首會帶領本港經濟發展,但更多人會問嘅係會唔會失去香港核心價值,呢啲都係特首要答嘅問題喎。

訪問中,張炳良又自爆年輕時已對政治好有興趣,記得五十年代仲係後生仔嘅時候,為咗了解啱啱成立嘅新中國,就走去左派戲院睇內地電影,每當毛主席出鏡時啲人就會企起身,認真趣怪。張炳良仲試過喺學校孖同學仔搞十.一及雙十活動,搞到畀老師鬧佢做乜喺學校講政治喎。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!