中環出更:郭太 許冠文笑談「男女戰爭」

憑住一條電話線而挽救咗不少生命嘅服務機構「生命熱線」尋日舉行發布會,請來名導演高志森及有「冷面笑匠」之稱嘅許冠文(Michael)聯手合作,喺明年二月十日開演一場名為《男女戰爭》嘅個人棟篤笑,為機構籌款。

生命熱線主席兼棟篤笑名譽贊助人郭炳湘太太李天穎一見到Michael就好興奮咁同佢握手合照,原來佢係Michael嘅忠實粉絲。佢話好欣賞對方幽默搞笑嘅才華,雖然自己好少睇港產片,但唔會錯過《半斤八両》、《鬼馬雙星》等經典笑劇。《男女戰爭》係講兩性相處之道,郭太話,夫婦之間最緊要互相遷就,如果嗌起交上嚟,咪隔一晚攤凍先再傾囉,不過邊個氹番邊個先,就要睇邊個唔啱在先喇。

用棟篤笑追女仔

棟篤笑主角Michael同太太相處有道,絕招係要識得「做戲」。佢解釋,做戲即係要識得氹對方,好似久唔久讚吓太太瘦咗,如果太太唔信,佢就會加多句「唔通連你老公我都唔知咩!」佢笑笑口話,棟篤笑用嚟追女仔一流,但佢就只係用嚟追過一個女仔,就係佢老婆喇,如果佢太太聽到,肯定冧爆。

兼任監製同導演嘅高志森話,籌備今次棟篤笑嘅靈感,係來自老友Michael嘅理論:「有時度棟篤笑內容度到冇位,好似入咗絕路,其實未嘗唔係好事,因為一旦解決咗個死位,就可以製造出人意表嘅劇情。」佢覺得同生命一樣,當人覺得冇路可走嘅時候,其實正好「柳暗花明又一村」,只要勇於面對,一定會有更精彩嘅未來。

卓妮

「Money18免費即秒股票報價網站」現推出8升級功能,財經資訊,實時實發!