俗語話，「唔怕生壞命，最怕改錯名」，真係一啲都無講錯。名不正則言不順，言不順則事不成，港府咁多年來一事無成，就係因為阿茂整餅，冇嗰樣整嗰樣，結果除咗添煩添亂之外，乜都做唔到。
呢，港府三年前撥款一億元畀旅遊事務署成立咗個「盛事基金」，聲稱用來幫助非牟利機構籌辦文化、藝術、體育盛事，鞏固香港「亞洲盛事之都」地位喎。結果基金總共批出咗五千一百三十四萬元，資助咗十六個項目，不過咁，好多人根本唔覺香港有咁多「盛事」，係咪吹水o架？
本報記者踢爆，原來「盛事基金」所資助嘅「盛事」，其實係濫竽充數，好多項目同盛事扯唔上關係，部分項目又冷門、又冇吸引力，旅客完全冇興趣。所以呢，呢啲項目話就話加埋有七十七萬人次參與，但當中只有兩成係旅客，即係自己人玩晒咁滯。
睇番基金贊助嘅項目，就知道呢啲所謂「盛事」係幾咁九唔搭八。好似「六人板球賽」、「網球精英賽」、「國際無伴奏合唱節」、「國際爵士音樂節」等等，有啲項目普羅大眾連聽都未聽過。其中網球精英賽連續兩年都有資助，而國際爵士音樂節更涉嫌歧視本地樂隊，搞出好大風波添！
老實講，呢類咁「精英」嘅體育賽事同音樂節目，應該好似外國咁，有好多商業贊助，唔應該年年嘥公帑去資助，更唔應該搵「盛事基金」來過橋。正所謂，限米煮限飯，基金資源有限，應該用得其所，而唔係亂咁使錢，搞到有啲真正與大眾有關嘅文化活動反而被拒諸門外，引起好多團體不滿。
最令人莫名其妙嘅係，成立「盛事基金」其中一個主要目的係吸引旅客，但睇番過去所贊助嘅活動，究竟幾多同旅遊有關，睇怕連旅遊事務署都搞唔清楚。查實，「盛事基金」贊助嘅項目，好多同旅發局舉辦嘅活動基本上冇乜分別，都唔知贊助嚟做乜。
嗱，旅發局十二月三十一晚舉辦「除夕倒數詠香江」，今年仲要由政府包底添，而「盛事基金」亦不甘後人，撥款一百四十萬元資助「香港龍獅節」喺一月一日迎新，兩個項目相隔唔夠一日，大同小異，唔止濫竽充數，簡直浪費公帑。
講開又講，香港旅遊業全靠內地客支撐，佢哋嚟香港嘅主要目的係消費掃貨，對九唔搭八嘅所謂盛事根本冇興趣，當局與其浪費金錢搞埋咁多唔等使嘅嘢，不如諗吓點樣做好旅遊景點，以及加強監管，杜絕劏客醜聞仲實際喇！