煲呔曾任內最後一次上京述職，領導人深知講多無謂，食多會滯，本着好來好去，只好內心叫苦，嘴上對其「管治團隊充分肯定」。要是煲呔曾知情識趣，中央的「客套美言」，其實叫佢臨走咪玩嘢，唔好再越俎代庖，開咁多無謂高職厚祿益自己友咯！專心收拾殘局仲好喇！
煲呔曾及其班子，如果真係有心為港人做事，真係「福為民開」，今時今日嘅香港，基層市民就唔使咁悲情：公共醫療一塌糊塗，醫療失誤無日無之，老化的殘舊公立醫院如油麻地廣華醫院又唔肯重建；回歸以來，窮人愈來愈多，在職貧窮亦然；安老又紙上談兵，完全沒有長期政策。
廢柴政府，唔好話搞唔掂住屋問題，劏房悲劇近年常發生，公屋上樓輪候冊名單愈積愈多，三年上到樓又係廢噏；嗱嗱嗱，即使跨境學童因轉車而潛在的風險多多，政府都隻眼開隻眼閉，沒有商討政策，復開額外過關時段，總之方便自己做嘢就話之你！
不妨講個古仔，話說子產主持鄭國政事時，曾用自己所乘的車輛幫助別人渡過溱水和洧水。孟子聽到後，就話：這只是小恩小惠；子產不懂得政治。如果十一月修成走人的橋，十二月修成走車的橋，百姓就不會為渡河的事發愁了。君子把政治搞好了，他外出鳴鑼開道都可以，怎麼有需要一個一個地幫其渡河呢？煲呔曾自詡政治家，可他只顧自己渡河，連幫個別百姓渡河也懶去做，如此治港的「政治家」，講出來認真羞家。
施友朋