中環出更：Ann蔣遊工展 金牛買麵食檸檬
早前有人出醜唔知價，用二百元買原價六十元一打嘅蛋撻，事後畀人笑到面都黃。同樣有工商界背景嘅全國政協委員蔣麗芸（阿Ann），尋日手持一張千元金牛到工展會，首站去售賣五十元一大袋江戶麵嘅商舖大手掃貨時，亦慘被店員請食檸檬，唔好誤會以為阿Ann唔知麵價，只係間舖頭原來唔收金牛，阿Ann隨即向黨友同廠商會朋友「籌旗」暫時應急，最後佢買咗四袋，盛惠二百大元，阿Ann事後好大方將其中三袋麵分畀其他人拎返屋企試下。
劉江華失望而回
每年工展會都畀好多機會年輕人創業，阿Ann亦有身體力行支持由中學生營運嘅商舖，購買價值百多元嘅紅外線感應智能燈，據聞班中學生事後仲會將部分收益捐予公益金。同場嘅行政會議成員劉江華則專程到場購買台灣嘅黑衣花生，不過佢今次就要失望而回喇，因為佢搵極都搵唔到黑衣花生嘅蹤影喎。