中環出更：東華準主席 搵李三元「干政」
東華三院副主席陳文綺慧（Viola）明年四月將榮升主席，為免「冷落」家族生意，Viola近日加緊衝刺，完成手頭工作。佢日前相約前東華主席李三元（John）去銅鑼灣高級餐廳Bella Vita品嘗意菜，交流未來大計。
Viola老公係培力藥業集團主席陳宇齡，兩人拍住上度新橋，除推出健康食品，連狗仔都照顧周到，年前首創狗靈芝丸，賣個滿堂紅，近日又有新主意，計劃推出靈芝朱古力，不過Viola上任在即，萬事以東華為先，大計恐怕要押後嘞。
John想讀歷史學博士
Viola同John都係資深「東華人」，相識十年，好老友。阿John派定心丸話，交棒後好少左右東華「內政」，但只要Viola開到聲，一定瞓身支持。阿John年多前重返中大校園讀歷史學碩士，眨眼已畢業，成績仲名列前茅添。歷史博大精深，佢話愈讀愈有癮，心思思想拎埋個歷史學博士學位。事關大公子李曠怡已接掌家族皮革生意，打理得有聲有色，阿John大可放心做快樂書生。