政情：破欠金主席盼善用盈餘
做咗破產欠薪保障基金委員會主席六年嘅陳鎮仁，仲有三個月就卸任，雖然經濟平穩無大型倒閉結業潮，令到基金盈餘創新高，有超過廿六億元，但原來根據法例規定，基金盈餘只可以做港元定期存款，喺近乎零息嘅環境下，陳鎮仁大呻回報簡直係慘無人道。
陳鎮仁話，政府好多基金都可以用部分嚟投資，但破欠基金就寫明只可以做港元定期存款，佢話如果可以放喺人民幣、美元甚至乎買下國債等等呢啲穩陣嘅投資，起碼可以追上通脹，但依家就得個擺字，佢話會向政府提出可以用基金投資，希望獲得批准。
做咗六年主席又做過四年委員，陳鎮仁喺呢個委員會已經十年，佢話最難忘嘅係○二年委員會決定大加徵費由二百五十蚊加到六百蚊，來自商界嘅佢即刻畀朋友鬧餐懵，「你估破欠基金真係會破產咩，政府都唔畀啦」。最後佢承諾當經濟好番時會減番到二百五十蚊，結果就喺佢卸任前通過咗，遲吓過埋立法會，咁就證明佢呢個主席真係牙齒當金使，圓滿收場喇。