政情：黃友嘉周身刀 從政路路通
二○一一年眨眼快成過去式，近年出謀獻策甚多嘅中華廠商會亦「夠鐘」換屆。會長黃友嘉（David）任期至本月底，功德圓滿，交棒畀副會長施榮懷。盛傳David「落莊」後，憑豐富財金經驗，將前程錦繡，或進身「官門」，做財金高官，坊間其中一個講法，係去中央政策組打骰。行情看漲，不過David早前卻多次表明心迹，話唔恨做官。
或同大輝爭議席
David快將揭開人生新一頁，佢最近向友人亮出新卡片，佢由下月一日開始嘅新身份，係香港工商專業聯會主席，佢對前途嘅諗法亦開放咗，唔再抗拒做官。如果David願意走入「官門」，早前關於佢喺下屆政府做中央政策組首席顧問嘅傳聞，即係有幾分真喇。不過依家特首選舉正進行得如火如荼，好多嘢都未輪到疑似未來管治班子打算，所有潛質之士，依家暫時只能夠翹埋手「等運到」。
對於從政，David連參加立法會選舉原來都有考慮。至於喺邊度出選，會唔會同工業界（二）即現時廠商會嘅代表林大輝拗手瓜，David話都可以諗吓。如果佢喺廠商會出選，如何安置林大輝？David就滿肚密圈，認為大輝亦有位可走，或者佢去直選都未定呢。總之「落莊」後David好瀟灑，今年五十四歲嘅佢，可塑性甚高。
David最有興趣就係做研究，工商專業聯會成立於一九九○年，會員囊括唔少政商界猛人，作風一向低調，近年曾就安老按揭、最低工資等問題發表過研究報告。David係芝加哥大學經濟系博士，喺美國聯儲局做過幾年經濟研究員。不過佢有興趣嘅唔單止係經濟，行政會議成員角色、行政立法關係等，佢都有自己嘅睇法。
不過其實背景幾好嘅人才都係假，都要特區政府爭氣至得，如果依照回歸後十幾年嘅軌迹，幾打得嘅人都吸咗落去呢個無底洞，都係發揮唔到佢哋嘅專長。唔知David有無心理準備呢？唔知佢有無本事，扭轉呢個局面呢？