再有遊客吊吊揈 疏於監管是死症

唉吔吔,搞乜鬼又有內地遊客幾乎流落街頭呀?套用特首參選人唐英年未辭官之前嘅從政金句,今鋪再次有人吊吊揈。莫非又係惡導遊強迫購物失敗,所以一怒之下將團友掟出街餐風宿露?

不如睇睇事發經過係點先啦。上星期六平安夜晚上大約九點,往美孚方向嘅九巴2A巴士緊急煞停於弼街十字路口,原來當時有一名男子拖住行李篋衝出馬路。

拖住行李篋衝出馬路嘅男子到底係何方神聖?呢一位激動男子係來自福建等地內地遊客其中之一,因為抵達旺角準備入住旅館被拒諸門外,同其他團友被迫街頭聚集,結果憤然衝出馬路抗議。

內地遊客被拒諸門外嘅原因有兩個講法。第一個講法係咁嘅,負責接待嘅旅行社職員話喎,早已預約旅館房間,並且全數支付費用,不過旅館將房間高價賣咗畀其他人,即係坐地起價嘅「炒房」。旅行社職員仲話,導遊從來冇棄團,旅行社老闆更加親自到場打點處理,直至凌晨安頓好團友先至離開。由於事件圓滿解決,所以冇向旅遊業議會匯報。

至於第二個講法就係咁,旅館負責人話喎,入住前一日收到旅行社來電要求取消房間預約,而且索取退款,先至引致冇房接待。負責人仲講得相當仗義,有協助遊客尋找其他旅館咁話。

邊一個講法先至係真相呢?計功夫茶話齋,無論邊一個講法係真相,再有遊客吊吊揈簡直係香港之恥,港府監管不力難辭其咎!

喂喂喂,旅遊業係香港經濟支柱之一,內地遊客更加係人人倒履相迎嘅運財童子,萬一待慢客人而造成趕客效應,經濟損失邊個負責呀?你知啦,黑店宰客已經時有所聞,強迫購物亦係禁之不絕,若然再加上流落街頭嘅悲慘遭遇,隨時真係嚇到遊客望而卻步㗎。

即係咁,如果係旅館坐地起價吊高嚟賣,唔該政府好好監管。又即係咁,如果係旅行社失驚無神取消房間預約,唔該政府好好監管。香港旅遊業醜聞不絕,歸根究柢係疏於監管所致,如果唔醫好呢一個死症,醜聞肯定陸續有來。

冇耐之前,商務及經濟發展局建議成立一個全新嘅監管機構,暫時名為旅遊業監管局。旅監局將會由業外人士主導,避免自己人管自己人嘅毛病,取代由業界組成嘅旅遊業議會部分功能,一條龍總攬發牌、監管以及懲處等等工作。局方又建議提高旅行社註冊門檻,保障遊客權益,重整香港形象,有關措施預計三年後實施。

不如咁講啦,世事往往說易行難,監管嘅方向正確,怕只怕到時落實無力咋!