政情:網民力數煲呔曾罪狀

煲呔曾治港近七年懶理民間疾苦,日前上京述職時聽到有國家領導人講咗幾句門面肯定港府表現就洋洋得意,有網民事後睇唔過眼,狂炳煲呔曾係「狗奴才」,淨係識自吹自擂同「擦鞋」,完全唔提窮人喺佢任內多咗幾多同樓價增長咗幾多,有網民講到內地孕婦來港產子問題(雙非)時更加係心中有氣,明言想爆粗反駁喎。

數十名網民喺特首辦社交網站facebook連珠炮發力數煲呔曾禍港施政證據,就以「雙非」問題為例,有網民直言煲呔曾假惺惺提及有關問題,實際係「雙非」問題唔係今日先發生,過去十年就「雙非」問題已經令好多媽媽受到不合理對待。有網民亦指煲呔曾講過每日睇六份報紙,真係完全唔能夠接受今日先走出來反映意見。另有網民更直言想爆粗,因為根本冇人叫港府向「雙非」中門大開。

煲呔曾見親領導人淨係識避重就輕,成日聽啲唔聽啲疑似扭曲佢哋講話嘅內容,如果煲呔曾繼續懶理民意訴求嘅話,相信會有更多網民以更重火力直斥其非。

第一手消息請下載on.cc東方互動iPhone/iPad/Android Apps「Money18免費即秒股票報價網站」現推出8升級功能,財經資訊,實時實發!