政情：黃家和獲熊本「通行證」
香港餐飲聯業協會會長黃家和（Simon）早前同十七名飲食界朋友，到日本福岡、鹿兒島、宮崎同熊本各縣作交流，據聞當地以高規格接待代表團以表重視，所以餐餐奉上上等和牛同拉麵等食物，美食當前，代表團成員幾乎每個都有增磅，好似Simon返港後就發現肥咗四磅幾。Simon仲攞到熊本縣嘅「通行證」添。
話說九州熊本縣知事Kabashima今年二月曾經來港宣傳熊本縣，認識咗Simon之後惺惺相惜，當時Simon應承對方會喺今年內探望佢，但因為三月發生大地震，Simon要延遲到最近至可以履行承諾。
知事見到Simon後好開心，公開大讚港人守信用，仲送咗一個別針畀Simon，講到明只要喺熊本縣出示呢個別針，話畀人哋聽係知事嘅朋友，就可得到當地特別招待喎，簡直就係「通行證」一樣。唔知Simon第時會唔會因而去多啲熊本縣呢？