中環出更：飼料大王 淡定應對禽流感
禽流感死灰復燃，搞到市民無活雞做冬。「飼料大王」兼潮州商會會長陳幼南都慨嘆受影響，訂購雞飼料應聲下跌。
天寒地凍，加上聖誕長假，尋日沙田馬場亦難免顯得冷清。陳幼南同太太入場消遣吓，馬會會所有齊中西餐，唔食活雞，一樣大把選擇。
講起禽流感突襲，陳會長處之泰然。佢話，美國、加拿大做足防疫措施，一樣有爆發，所以唔驚得咁多。
受疫潮影響，陳會長話，呢排雞飼料的確賣少咗，好彩佢公司有生產鴨、鵝同豬飼料，拉上補下，影響唔算大。
鄭錦鐘過大海享天倫
保良局副主席鄭錦鐘（Eric）夫婦都有入場湊熱鬧，Eric兒孫滿堂，聖誕當日叫齊仔女及新抱，喺家中開BBQ派對。今日再拉隊去澳門新酒店Banyan Tree唞唞，Eric專登訂咗間靚房，有埋私人泳池，等孫兒可以盡情暢泳。
轉過頭，卓妮撞見維昌洋行中國有限公司行政總裁陳大枝。佢嘅愛駒「生豪」出戰第三場勝出，頭馬獎金派三十八萬四千多元，呢份聖誕禮物來得正合時。
點慶祝？陳生話:「梗係食生蠔。」原來佢係生蠔迷，馬名都改埋同一諧音，今次咁lucky，會請晒太太同女兒擦餐勁，仲會開香檳高興吓。
同場仲有立法會議員林大輝，見佢容光煥發，原來早前去咗台灣三日。搞乜？之唔係參觀藍、綠陣營嘅選舉工程，順便偷吓師。
卓妮