政情：議員聖誕願望：煲呔曾速走

夕陽政府施政劣迹斑斑，班立法會議員鬧都鬧到怕，個個聖誕節願望都想去舊迎新，快啲換過個政府。新民黨主席葉劉淑儀話，出年最緊要係香港有個好嘅特首，為啲年輕人帶嚟機會。

不過，工聯會王國興對夕陽政府似乎仲未死心，仲列咗張願望清單，又話要傷殘人士搭車有優惠，又話要將勞工假期同公眾假期統一，仲話要中電減電費添。夕陽政府叫中電加少啲電費都難，佢個願望睇怕都好難成真。

公民黨陳淑莊（Tanya）嘅願望就係要「向錢看」，話最緊要係有多啲人捐錢落個公文袋，等下年嘅立法會選舉都可以多啲資源，認真夠實際。民主黨李永達（高達）就希望該黨主席何俊仁可以喺泛民特首初選中勝出，相信高達可以願望達成嘅機會，畀Tanya會高好多。

工黨張國柱就一條心埋首搞工黨，希望工黨有好發展，非常行貨。總括而言班議員已經對夕陽政府冇晒信心，最希望煲呔曾早啲收工。

陳淑莊

希望公民黨可以有多啲捐款，立法會選舉可以吸取區議會選舉嘅經驗，黨員一齊努力，仲要快啲換個聽多啲民意嘅政府。

葉劉淑儀

政府話搞六大產業，醫療、教育已經變咗「慘業」，自資大學好難自資，年輕人好難向上流動，希望出年換個好特首，為年輕人帶嚟出路。

李永達

希望何俊仁贏到泛民特首初選，民主黨喺立會選舉有好成績，亦都希望政府公平對待建制派同泛民，快啲解決房屋問題，煲呔曾唔好阻住土地供應。

王國興

希望政府將勞工假同公眾假統一，等打工仔多啲假放，全部傷殘人士搭車都有優惠，政府唔好帶頭歧視，同埋希望中電減電費。

張國柱

希望工黨發展好啲，可以集結到香港百分之九十九嘅人，一齊對抗百分之一嘅霸權，盡快有普選同廢除區議會委任制。