政情:吳明欽囡囡撐鐵頭仁

民主黨主席何俊仁(鐵頭仁)尋日搞咗個特首政綱發布會,搵到五位嘉賓輪流發言以示支持,當中有一個好陌生嘅名字叫吳思諾,直到上台嗰一刻,大家立即眼前一亮,係一位八十後美女,但仍然唔知佢係邊位。後來大家先知道,原來佢係已故立法局議員吳明欽個女。

吳明欽早喺九二年因血癌過身,佢同鐵頭仁係莫逆之交,據思諾所講,鐵頭仁對佢一家有情有義,每逢過時過節都一定搵埋佢哋食飯。思諾又話,細個時覺得好奇怪,明明鐵頭仁成日上電視,但點解成日都咁得閒去探佢哋呢?直到大個,先知呢份係鐵頭仁對佢父親嘅感情。

思諾憶述,每年爸爸死忌,鐵頭仁都會同一班屯門街坊去拜祭佢爸爸,風雨不改,拜祭時講得最多嘅就係「民主」呢兩隻字,佢亦堅信呢份對吳明欽嘅感情,成為咗鐵頭仁推動民主運動數十年嘅動力之一。思諾致詞不徐不疾、字字鏗鏘,短短幾句說話已經感動在場人士,係整個政綱發布會嘅最大亮點。鐵頭仁搵到佢撐場打氣,絕對係一個好開始。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!