政情:張曼娟愛留港過聖誕

一連八日嘅免費聖誕書展尋日喺會展開鑼,四十位本地同台灣著名作家都嚟撐場,當中包括台灣新聞文化中心主任兼知名作家張曼娟。佢話好鍾意香港聖誕節日氣氛濃厚,加上呢個「購物天堂」喺聖誕期間,好多商戶都會大減價,令佢同台灣來港嘅朋友玩到樂而忘返。

張曼娟來港雖然只有兩個半月,但已感受到香港並唔似大家所講嘅「文化沙漠」,因為該中心剛舉行冇耐嘅「台灣月」上,幾乎每個活動都爆場,參加者仲來自不同年齡層,令佢感覺到港人真心喜歡台灣文化。

聖誕節聽日就到,係張曼娟第二年喺香港度過,佢最鍾意拎住部相機到處影聖誕裝飾,ifc、圓方、1881、世貿中心都畀佢影勻晒,印象最深嘅係世貿中心用羽毛造嘅聖誕樹,佢仲將影完嘅相放上facebook同粉絲分享。

一年將盡,佢希望中心未來可以吸引更多人關注台灣文化,而自己就會喺新年之後再續寫作之路。佢透露,下一部著作會同香港有關,因為活潑多變嘅香港畀到佢好多靈感。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!