中環出更：何倍倩上京 攞女企業家獎
恒生新抱兼Zensation Beaute行政總裁何倍倩（Anina）成功將美容生意拓展到美國比華利山，生意頭腦精。咁叻女，北京都頒發傑出女企業家獎畀佢，Anina日前冒住嚴寒去人民大會堂攞獎，凍到患上感冒。
北京氣溫凍到零度以下，喺外國長大嘅Anina都頂唔順，但伊人好捱得，撐住靚樣上台攞獎。來自兩岸四地嘅百名女企業家亦同時獲獎，除Anina外，先施百貨後人馬天惠都榜上有名。叻女雲集，齊交流營商、扮靚心得，好熱鬧。
四出搜尋國產靚裙
來到北京，Anina把握機會行798藝術區，穿梭大小特色商店，仲喺南鑼鼓巷發現「寶物」添。Anina話，早前睇時尚雜誌VOGUE，被封面女郎穿着嘅火紅色連身裙吸引，一查之下，原來係國產冒升名牌「chictopia」，佢四出打聽，終於喺南鑼鼓巷搵到專門店，仲買到同封面女郎一模一樣嘅靚裙，價錢只係二千幾蚊港紙，開心過執到寶。