政情：立會今日真正(火羅)爆
立法會遷入添馬艦新大樓後多次爆出(火羅)事，包括無理限制採訪辣興傳媒、工程同設計甩漏多多令議員職員怨聲載道、投票同計時系統多次出錯等等，據悉今日更加成幢新大樓都會(火羅)爆，個個議員、職員同記者都可能會聞到(火羅)味！
今次講緊嘅唔係蝦碌、甩漏同出錯嗰種(火羅)，而係真係燒燶嘢嗰隻(火羅)味。話說新大樓設施完備，為免凍親班尊貴嘅議員，更特設暖氣系統，可以喺寒冬日子將室內氣溫提高至攝氏二十度，暖氣系統今日會首次啟用。由於系統首次啟動時可能會產生輕微(火羅)味，立法會秘書處日前特別發出通告，通知全體議員同職員有關情況，以免有人聞到(火羅)味後，誤會新大樓又出事引發火災，急急報警求助同慌忙疏散，令立法會形象又(火羅)多次。