政情：小伏佳節倍思貧童
自從跳水王后伏明霞擔任小母牛愛心大使之後，經常風塵僕僕咁走訪內地嘅貧困山區，為有需要嘅人提供協助。尋日佢就好及時咁從貴州趕返香港，代表小母牛接收由電玩商捐贈嘅六十萬元支票，夜晚就同屋企人食飯過冬。伏明霞話內地其實係無「做冬」呢回事，香港嘅節日就特別多，各有唔同嘅特色，例如今年嘅冬至，佢媽咪都嚟咗香港同佢一家一齊食飯，雖然做咗咁多年家庭主婦，過節餐飯都係唔使佢操勞。
佳節當前，伏明霞都好記掛窮鄉僻壤嘅貧困兒童。小母牛明年去邊度探訪目前未有決定，但若然配合囡囡嘅假期，都會帶佢去山區度睇吓，等佢知道內地仲有好多小朋友喺物資缺乏嘅環境之下生活，亟需善長嘅幫助，畀佢知目前嘅生活係幾咁幸福。不過，去貧瘠山區體驗係明年嘅事，冬至之後伏明霞將會隨同家人去新加坡，過番幾日溫暖嘅聖誕假期。