中環出更：范太現身瑪麗惹虛驚
近排政界人士輪住嚟病，大家都要保重身體。尋日下午約三時四十五分，全國人大常委范徐麗泰同姑仔范尚霞現身瑪麗醫院，不過唔係去探住院留醫嘅教育局局長孫明揚，而係喺一樓放射部候診睇醫生，歷時大半個鐘。
約四時二十分，范太睇完醫生欲離開，卓妮上前問候佢有乜唔舒服，佢露出招牌親切笑容話：「冇嘢，右腳底痛，嚟照吓腳啫！」卓妮見佢精神爽利、腳步輕盈，都唔似有咩大件事。不過，放射部唔係睇一般頭暈身o架喎！
腳筋發炎去訂造鞋墊
卓妮致電范太囝囝范駿華（Andrew）問個清楚，Andrew唔知媽媽去咗睇醫生，不過就話應該冇咩事，事關前日同媽媽講電話都唔覺有異樣。
冇耐Andrew又覆電，原來佢唔放心，即刻致電媽媽問清楚，謎團終於打開，查實范太腳筋發炎，去醫院訂造鞋墊啫！
范太勤政為民，斷估佢都係平時行得路多，所以先至搞到腳筋發炎，以後記得錫住身體嘞！