中環出更：企業新生代落吧開P掟鏢
聖誕氣氛愈嚟愈濃，平時公私兩忙嘅城中青年才俊，仲唔趁機玩到盡？日前銅鑼灣鬧市一間酒吧聚集逾百名企業界新生代，參加由中華出入口商會青年部等八名年輕人組織合作搞嘅派對，大家齊玩掟飛鏢賀聖誕，氣氛好熱鬧。
中出青年部主任李美辰一早到場打點，活躍於幾個青年組織嘅老公蔡德昇都形影不離傍到實。有份合辦派對嘅香港青年聯會主席葉振都（Adrian）、香港中國企業協會青委主任陳沛良、華菁會秘書長陳冉等人，亦帶埋兄弟姊妹嚟玩。同場仲有浙江、湖北、上海及廈門等中港青年交流促進會嘅各界菁英，前工總主席孫啟烈大仔、工總青委主任孫榮聰亦現身撐場。
玩埋大抽獎
嗰日大家喺派對裏面戴起聖誕帽，活動除咗掟飛鏢，當然仲有大抽獎，人人帶嚟嘅禮物都別出心裁，個個都滿載而歸——除咗有禮物之外，仲將歡樂帶番屋企。
Adrian近排為咗會務忙到飛起，啱啱又率團去山東探訪至聖先師孔子嘅家鄉返嚟。不過佢愈忙愈開心，事關日前佢同青聯副主席霍啟剛、常董莊家彬一齊上電視傾閒偈，節目出街後引起好大回響，唔少低調嘅富二代主動現身話想入會添！
卓妮