政情：陳淑莊清爽短髮哄動議事堂
立法會議員陳淑莊Tanya過去一段時間嘅運氣認真麻麻，先係同拍拖八年嘅男友分手，前排仲喺區議會選舉中痛失議席。可能受咗唔少打擊，尋日一見到佢嘅時候大嚇一跳，本來留有一頭長長秀髮嘅Tanya，突然換上超清爽短髮造型，議事堂內唔少人都議論紛紛。
純粹「尋求刺激」
Tanya把長頭髮已經跟咗佢十幾年，原來佢早就密謀揮刀一剪，同煩惱絲講再見。尋日唔少議員見到佢個新look都好驚訝，好似陳偉業就以為Tanya有新戀情，嚇到Tanya即時耍手，話呢次純粹係「尋求刺激」之舉。其他例如黃國健就大讚Tanya新形象後生咗廿年，張文光亦激賞Tanya嘅短髮，仲感慨男士剪髮不外乎「偷薄、剪短、快」五個字，及唔上女士咁多花款。
其實Tanya都擔心選民未必接受佢嘅新形象，所以趁距離立法會選舉改選尚有一段時間就趁早剪咗先。希望佢有look之餘，衰運都離佢而去啦。