地球先生病咗，藍天白雲冇咗，熱愛環保嘅你應該點做呀？冇錯嘞，你應該略盡綿力改善環境，譬如話用少啲電，一來可以減少廢氣排放，二來當做抵制瘋狂加價嘅電力公司都好吖。喂，電費真係好鬼死貴o架，中電又話企硬加價接近一成，懶理群情洶湧反對「電霸」巧取豪奪。喺咁嘅情況之下，慳電實在係為己為人嘅一大功德。
除咗慳電之外，有冇其他拯救地球嘅方略？有嘅有嘅，環保署○八年難得精明想出一條妙計，就係鼓勵天台搞綠化，種植大量植物抗衡地球暖化。你知啦，天台綠化有助建築物降溫，夏天之時冷氣機都唔使開咁多。
根據環保署嘅大計，學校同非牟利機構都可以透過「環境及自然保育基金」申請撥款，資助天台搞綠化工程。至於私人大廈以及商業機構，暫時係不受理嘅。本來呢，資助學校同非牟利機構綠化天台係好事，問題係特區政府嘅官僚作風簡直係死症。申請手續繁複到暈，審批時間又長，成效自然不彰。部分學校即使成功申請撥款，不過成本上漲被迫放棄。
好似中區聖士提反女子中學咁吖，兩年前申請綠化天台，幾個月前先至獲批二十七萬元資助。問題係，由申請到獲批已經事隔一年有多，建築材料加晒價嘞，所以被迫放棄部分灌溉設施。如果灌溉有困難，所謂綠化好明顯有機會失敗化。
身兼元朗多間學校董事嘅元朗區議員周永勤就話嘞，好多學校都想搞天台綠化，可惜無功而還。好多舊式學校老早已經遺失校舍圖則，加上申請規定要聘請有註冊工程師嘅顧問公司勘察同跟進，動不動都要十幾二十萬顧問費。試想想，如果事前花費咁多錢而最終會有申請被拒嘅風險，會唔會有學校願意博一鋪吖？咪玩啦！
簡單咁講，申請環境及自然保育基金要求多多，又要呢樣，又要嗰樣，煩到申請者頭暈又作嘔。於是乎咯喎，不少學校同非牟利機構索性打退堂鼓。數字顯示，近年申請綠化天台有下降趨勢，計劃推出首年環保署接獲五十宗申請，第二年都有六十四宗，不過舊年降至二十九宗，今年頭十一個月亦只不過三十五宗，完全唔係踴躍嗰隻。
所以話啫，呢個政府冇嘢叻，最叻就係好心做壞事。天台綠化明明係好事，相關計劃一落到官僚手上即刻變咗一潭死水。正如立法會議員王國興話齋，天台綠化只係社會活動啫，審批撥款使乜咁嚴苛呀！
好心環保署放寬審批啦，否則天台綠化工程恐怕爛尾o架咋。