小吉艷麗冬裝 「好出色」
步入寒冬，好多人都換上厚厚嘅冷色冬裝，世界仿似頓失顏色。不過凡事都有例外，健康快車創會主席方黃吉雯就同大家做個真人示範，原來冬裝都可以着得好艷麗，好「出色」。
西裝褸繡滿花朵
卓妮日前喺一個活動上見到小吉，一向對衣着好講究嘅佢穿上粉色嘅西裝褸，上面繡住一朵朵色彩繽紛嘅小花，好有初春嘅感覺，將冬天寒氣一掃而空，下身就配襯黑色荷葉邊及膝裙，令整體上感覺好平衡。
佢叫大家唔使估係咩牌子，話有時唔一定要着某某名牌先好睇喎，最緊要適合自己，今次着呢件衫，好多朋友都讚話好特別好好睇。