中環出更：潮州公會就職人多勢眾

要數全場人氣最旺，莫過於公會永遠榮譽會長、前東華三院主席馬鴻銘（John）喇！事關佢屋企人空群而出，太太蔡加敏、三歲半嘅大女Chelsi以及外父「玩具大王」蔡志明都嚟撐場。

心情靚絕嘅蔡志明笑稱女婿係細佬，望真啲，蔡生又真係愈嚟愈後生喎！

蔡志明（右）一邊搭住女婿馬鴻銘膊頭，一邊笑稱要同細佬影張靚相先。

潮人有盛事，又點少得重量級人物陳有慶（右），左為大仔陳智文。（溫國佳攝）

尋日現身嘅潮人數之不盡，有潮屬社團總會主席許學之、亞洲金融集團主席陳有慶及大仔陳智文、飼料大王前潮州商會會長陳偉南及現任會長囝囝陳幼南等人。

馬鴻銘湊龍鳳胎苦樂「乘」雙

馬鴻銘提起大女及一對龍鳳胎就好開心，尤其是一對細B，雖然湊佢哋時雙倍辛苦，但開心亦係雙倍。

大女Chelsi現時喺外婆蔡李惠莉做校監嘅安基司幼稚園返學，蔡太曾經讚孫女好乖，不過阿John就成個嚴父咁款，話Chelsi好霸道，會搶同學仔嘅玩具，而且牙尖嘴利，仲話乖？

好少出席畀面派對嘅陳智文，有個藝術天分高嘅愛女陳曉鈴，陳有慶太太對呢個孫女讚譽有加，早已揚聲準備搞一場祖孫三代慈善畫展，作為慶祝兩公婆結婚六十周年紀念。陳智文話，件事籌備得好順利，預計明年喺香港大會堂舉辦，到時大家要拭目以待喇！