政情：施榮懷喜事接二連三
快活谷馬場嘅快活廂房前日可謂喜氣連連，因為中華廠商聯合會舉行廠商會盃嘅賽事，就適逢候任會長施榮懷與行政總裁梁世華生日。其中施榮懷更於同日獲職訓局頒授榮譽院士嘅殊榮。
即將坐上廠商會第一把交椅嘅施榮懷話，舉行廠商會盃嘅賽事日期係由馬會安排，咁啱就撞正佢同梁世華慶生之日。其實廠商會盃並非年年都舉行，對上一次係慶祝廠商會成立七十五周年，即係前年。佢個人認為呢啲咁高興嘅事，最好係每年都舉辦一次，而十多位廠商會成員就合資購入新西蘭良駒，廠商會首匹團體馬將於明年一月亮相。而呢匹咁具歷史意義嘅馬匹，叫做「創出商機」，個名咁有創意，施榮懷好謙咁話係集體嘅智慧，佢只不過係畀咗些少意見啫。
至於獲職訓局頒授榮譽院士嘅殊榮，施榮懷話係同佢十多年來支持職訓局嘅發展有關，而今次亦係個人嘅首個榮譽院士銜，真係一份令人難忘嘅生日禮物。