中環出更：菁英聖誕P生力軍登場
聖誕鐘響起，匯聚城中才俊嘅菁英會，前晚喺陽明山莊會所開Party，多位菁英生力軍登場，當中包括立法會議員梁劉柔芬千金林梁穎宇（Nisa）、莎莎老闆郭少明女婿陳振邦（Davis），仲有馬會大董葉澍堃公子葉瀚華（Ian）等，夠晒熱鬧。
莎莎駙馬 一索得男
派對以Bling Bling閃爍為主題，身為晚宴籌委會主席嘅Davis，拖埋懷有身孕嘅太太郭詩慧（Melody）撐場，Melody明年三月尾做媽媽，聽講今次一索得男，恭喜恭喜。Davis除咗係「莎莎駙馬」，仲係威威洗衣粉太子爺，平日兼顧兩邊生意，認真叻仔。
喺史丹福大學讀完MBA嘅Nisa，似足媽媽咁能幹，正幫手打理家族醫療生意。Nisa話，現時喺上海擁有腫瘤醫院、大型牙科連鎖診所，以及生物醫藥公司，生產糖尿病藥等，總投資額高達十億美元。咁叻女，媽媽大可印印腳嘞。
Ian都有乃父風範，身為律師嘅佢，近日轉工，加入全球管理諮詢機構麥肯斯做管理顧問，閒來寫食評，同爸爸齊享受人生。
講番晚宴，人氣十足，創會主席施榮忻、榮譽主席白富鴻、主席洪為民、常務副主席楊華勇及副主席莊家彬都嚟湊熱鬧，滿場飛敬酒。
全晚高潮係幸運大抽獎。菁英執委詹勝捐出一張單人來回東京機票，及一張單人來回倫敦機票，價值逾四萬港元。原來詹兄近日加盟香港航空擔任顧問，買機票易過買車票。佢又幫公司度新橋，搭飛機都可以用Wi-Fi上網，飛行期間，仲可以打電話，聽落又幾吸引噃。
卓妮