中環出更：青聯扮卡通人物過聖誕
香港青年聯會前晚聚集灣仔會展歡度聖誕，為配合「開心卡通」嘅主題，一班兄弟姊妹齊變身可愛卡通人物，賢慧社主席羅詠詩扮小熊維尼，副主席林玉茵就扮兔女郎，惟妙惟肖，仲有各種趣怪動物卡通造型帽子滿場飛，氣氛好熱鬧。不過，男士們比較含蓄唔扮嘢，大會就好貼心咁幫佢哋準備咗色彩鮮艷嘅超大型蝴蝶煲呔，玩味即刻返晒嚟。
選委李宗德拒表態
青聯主席葉振都、副主席霍啟剛、林亨利及朱鼎健等骨幹滿場飛打招呼，同場仲有常董霍啟山及吳景瀚、前主席陳仲尼同顧問李宗德。李宗德同囡囡李美辰都當選做選委，美辰更加係首次參選就得咗。卓妮問李宗德支持邊個做特首，佢好醒目話未決定喎。美辰老公蔡德昇當晚客串做司儀，活潑鬼馬，同平時斯文正經嘅形象好唔同。
晚會仲有幾位玩得好盡興嘅小豆丁，包括青聯常董邱達根囝囝邱華昊、前主席許華傑囝囝許懷熹及常董蔡敏思囡囡梁凱翹等，佢哋喺晚會表演唱誦聖詩，得到台下哥哥姐姐熱烈鼓掌，又有聖誕老人派禮物，成晚最開心嘅，非佢哋莫屬喇！