中環出更：迪士尼幻想工程 三女生奪冠
首屆「迪士尼幻想工程香港挑戰賽」賽果日前誕生，薩凡納藝術設計學院（SCAD）香港分校嘅學生從七十支參賽隊伍中脫穎而出奪冠，佢哋將會獲得全費資助，於下月代表香港前往美國加州迪士尼幻想工程總部參觀，仲會同全美幻想工程挑戰賽嘅總決賽隊伍交流添。
由薩凡納藝術設計學院香港分校三位女生梁嘉詠、陳曉鎣、高釧組成嘅冠軍隊伍，設計咗一個以迪士尼．彼思動畫《怪獸公司》為主題嘅遊樂地帶「Monstropolis」，當中包括機動遊樂設施、餐廳、影院，評判覺得個設計視野開闊，意念宏大但兼顧到細節，平衡度高。
香港迪士尼樂園度假區行政總裁金民豪話，呢項比賽喺美國已經有廿年歷史，香港係首個美國以外舉辦賽事嘅地區，證明度假區重視本地年輕人嘅發展。今次香港挑戰賽嘅亞軍同季軍分別來自理工大學同香港知專設計學院。