借地竟變廢墟　警方罪在無賴

好嘞，聽古仔咯喎，警方向地政總署借咗一幅地，位置係舊啟德機場跑道末端嘅消防局，結果呢一幅地皮喺無人管理嘅情況之下，變成滿目瘡痍嘅爛鬼廢墟！

你知啦，啟德機場自從一九九八年就光榮退役，一夜搬竇之後留低好多剩餘物資，消防局係其中之一。○五年警方諗住用得唔好嘥，向地政總署借地擺放塑膠水馬等等物資。點不知，警方原來係一個不負責任嘅無賴，地方借咗就乜都唔理，任得佢發霉生銹養老鼠。去到○八年，一場三級大火導致消防局嚴重受損，四百個塑膠水馬燒到溶溶爛爛。功夫茶思疑，當時奉命救火嘅消防員必定百般滋味在心頭，情況就好似親眼見到自己嘅祖屋付之一炬。喂，消防員走去射水灌救消防局，情況係幾咁弔詭呀！

消防局離奇失火嘅原因冇人知，不過點都同借用場地嘅警方管理不善有關。跟住落嚟仲荒誕，毀於一旦嘅消防局仍然冇人收拾殘局，卒之成為龍友嘅拍攝勝地，貪佢嗰度甩皮甩骨氣氛詭異，另有一番求之不得嘅缺憾美。至於對攝影冇乜興趣嘅氣槍發燒友，就將呢一個廢墟視作野戰樂園，得閒就約齊戰友開火，砰砰砰！砰砰砰！砰砰砰！雜草叢生嘅荒廢空地留下大量ＢＢ彈以及氣槍用嘅注氣罐。

簡單咁講，消防局遺址已經處於一個自出自入嘅無政府狀態，只要你唔怕頹垣敗瓦容易撞邪，施施然入內進行各式各樣嘅活動係冇人理嘅。

三級大火至今三年，點解警方仍然冇好好管理借用而來嘅場地？因乜事幹任由一幅官地淪為閒雜人等為所欲為嘅鬼域？唔使審啦，一定係唯懶主義作祟，塊地借返來擺放雜物之嘛，又唔係自己日日上班嘅警署，梗係懶得就懶啦。

立法會議員黃國健講得冇錯，警方行為等同租霸，而且咯喎，萬一闖入去嘅人出咗意外，警方難辭其咎。議員陳淑莊都講得啱，呢個唔係無王管，而係王不管，又發生火警，又有人擅闖，證明警方冇盡責。

講真吖，龍友入內拍攝或者槍王擅闖野戰，都算得上係不幸中之大幸咯，萬一不法分子利用廢墟進行不法活動，你叫號稱滅罪急先鋒嘅警方顏面何存呢？

總之，借地竟變廢墟，警方罪在無賴。如果當初租借香港嘅英國以同一手法管理，冇眼睇咯！