煲呔曾上月去夏威夷開亞太經合組織高峰會，同美國國務卿希拉妮會面，大鑼大鼓吹水話為持特區護照嘅港人，爭取去美國時可以唔使簽證，仲話希拉妮畀晒正面回應。誰知日前「政情」版指，美國駐港總領事踢爆，暫時無諗過再畀免簽證待遇喎！
「君子恥其言而過其行」。煲呔曾大言炎炎，港人都聽到慣，喺佢縮骨管治下，有幾單係「言顧行，行顧言」嘅君子之約？
煲呔曾剛愎自用，容易面黑就係人都知；早前又話睇報紙都會「心驚」。其實，一個人行得正、企得正，有乜鬼好驚？孔子話齋：「已矣乎！吾未見能見其過，而內自訟者也。」孔子嘅意思係話，算喇算喇！我從未看到過一個人，能隨時檢討自己的過錯，且在檢討到過錯以後，還能在內心自我審判。
呢種審判，查實無非天理、人欲之爭，煲呔曾如果夜半真正撫心自問，「管治」七年有何政績？政府庫房經年「水浸」，而基層仍難改善生活。旺角花園街大火慘劇，更暴露政府高官管治無能，淨係睇《東方日報》同埋《太陽報》對政府嘅鞭撻，就知官僚幾咁因循苟且、得過且過。
港人多安分守己，港人的拚搏精神仍未消失，然而，問題係政府太無能，窮人過百萬，在職貧窮都幾十萬人，搞到民怨沸騰。福為民開，講出來都羞家，「功成而弗居」，煲呔曾冇咁嘅修養；佢治港政績，經不起三句問，一問就露餡，貪天之功，叻到會飛！