政情：葉劉張震遠互相仰慕
已經暫停咗市區重建局主席職務嘅張震遠，尋日出席新民黨主席葉劉淑儀搞嘅匯賢智庫學苑活動，演講香港市區重建。張震遠話，雖然佢暫停咗職務，但因為一直好仰慕葉太，所以葉太開到聲，佢唔會托手㬹，以「仰慕葉劉淑儀嘅香港人」身份出席。葉太聽到後亦都好識做，話自己其實佢都好仰慕張震遠，聽見兩人對答認真難頂。
張震遠尋日只係以個人身份出席活動，又話一早已經應承咗葉太去演講，所以點都拍硬檔出席。佢仲賣口乖話，一直以來都好仰慕葉太，因為覺得葉太係有能力嘅人喎。葉太聽到不知幾好笑容，又回禮盛讚祖籍山東嘅張震遠係典型山東人性格，為人坦率，而且演講準備充足。
雖然張震遠口講仰慕葉太，但係佢擺明車馬為梁振英助選，唔知佢係咪已經睇死有意參選特首嘅葉太參選機會極微，所以諗住氹吓葉太開心呢？不過，如果葉太喺選委會攞唔夠一百五十票提名嘅話，睇怕都會縮沙。