中環出更：莎姐細女下月誕B
自由黨成功喺區議會選舉收復中西區山頂失地後，近日又傳出喜訊，就係副主席周梁淑怡（莎姐）第四度做外婆。莎姐早前好興奮同卓妮講，佢細女周智琪第二胎將於下月出世，真係恭喜晒！智琪喺○九年中已誕下一女，唔知今次會否追番個男丁呢？莎姐就話，依家啲後生鍾意驚喜，所以至今仲未知道肚裏面嗰個係仔定係女喎！
智琪嘅預產期係下月，啱啱撞正農曆新年，送兔迎龍，唔知佢個Baby會係屬兔定係屬龍呢？不過，無論屬乜都好，莎姐一樣錫到燶，又多個外孫湊，非常Happy。其實莎姐同黨友田北俊一樣，自○八年離開立法會後樂得輕鬆，見親面都係大談湊孫經，實行有孫萬事足，所以對於佢哋明年再度出山參選立法會，顯得撲朔迷離，莫非又係選舉策略？
田少湊孫要「排期」
田少就呻話，依家乖孫晉仔仲忙過佢，要「排期」到農曆年先至可以一齊出外滑雪，佢仲話，有時為咗見孫仔一面，成日要揸車四圍騰。不過，田少個口就話畀個孫搞到氹氹轉，但睇佢個樣都不知幾享受。