如果要選「全球最惹火城市」，香港必定係大熱門之一，不過，大家唔好會錯意喎，唔係千嬌百媚嗰種惹火，而係隱患處處，隨時發生沖天大火。
旺角花園街排檔一年內兩次火燒連環檔，證明本港消防安全漏洞百出。其實，街邊排檔嘅危機不過係冰山一角嘅咋，有樣計時炸彈仲得人驚，一旦引爆，破壞力分分鐘勁過當年嘉利大廈及嘉禾大廈兩場五級大火㗎。
近年市區舊樓酒吧、的士高同Ｋ場開到成行成市，尤其係位於大廈內自成一國嘅樓上竇，因為私隱度高，消費較平，成為蒲友首選，晚晚吸引大批年輕男女劈酒喪玩，連索Ｋ都有。
樂極往往生悲，最令人擔心嘅係，樓上竇通常集中喺同一幢商業大廈，十幾層樓幾乎全部改頭換面，變成酒吧或者咖啡室，構成極大嘅安全隱患。係人都知，呢類位處舊區嘅舊式商廈，無論消防設施定係走火通道設計，都難以配合改裝成酒吧食肆後激增嘅人流。更得人驚嘅係，部分經營者為咗慳地方，甚至隨意改建「另類劏房」，人為製造新嘅安全隱患。
後樓梯情況更加混亂不堪，原本用來走火嘅通道隨時變成地獄之門。呢，本來已經狹窄嘅空間，除咗堆滿紙皮及其他雜物，而且成地都係煙頭，好明顯唔少人喺度煲煙喇。仲有吖，唔少大廈嘅防煙門畀大垃圾桶擋住，而滅火筒亦已經過晒期，大吉利是講句，如果有人掟煙頭將紙皮點着，火勢迅速蔓延，大廈內嘅人逃生無門，到時真係死得人多。
睇吓統計數字就知道問題有幾嚴重。舊年截至十月，全港共有近七百六十間有酒牌場所涉及違反消防安全規定或違反發牌條件，其中近四成係樓上酒吧。樓上竇佔咁大比例，當局對呢類場所卻巡查不足，消防安全基本上零監管，簡直係靠害！
最離譜就係，根據食衞局發言人所講，現行法例並冇就同一大廈經營嘅酒牌處所設限，即係話開幾多間都得。人流唔加限制，消防設施又無王管，你話係咪攞市民條命較飛吖！
樓上竇危機四伏，跛腳鴨關人個關。幾年前造成四死五十幾傷嘅旺角嘉禾大廈火災，出事卡拉ＯＫ夜總會窗口被密封，冇灑水系統，火警通報系統又失靈，大廈內防煙門有啲被鎖、有啲根本冇門，慘劇歷歷在目，家陣樓上竇嘅消防安全仍然毫無改善，功夫茶想請問當局，係咪要等慘劇重演至肯做嘢吖？