立法會財務委員會尋日討論撥款近四百廿三億元畀大學教育資助委員會，負責攞錢嘅教育局副局長陳維安成為眾矢之的，事關早前佢喺教育事務委員會上留下伏線，將來可能要加大學學費，明年立法會就改選，咁搞法議員實唔收貨喇！無論泛民定係建制派都向陳維安發動全面攻勢，令陳副局四面楚歌，鬧咗兩個鐘後，毫無招架之力嘅佢最終以一句「唔好強人所難」作結。如果要議員夾硬批錢，就係強議員所難喇。
