政情：金勞詹嘆港足唔爭氣
唔好睇香港足運現時一潭死水，其實都有過風光時刻，金融服務界立法會議員詹培忠就最清楚，七十年代佢做過本地班霸精工同寶路華嘅領隊，當年香港外號「足球王國」，見證住香港足球最光輝一頁。近年港隊唔爭氣，排名跌到落全球一百六十八名，創歷史新低，所以金勞詹喺立法會入咗條口頭質詢，問政府點解港隊淪落到呢個地步。
金勞詹同我哋講，話自己當年做領隊時，香港足球好威水，可以話係亞洲一哥，日本、南韓等現時嘅亞洲足球強國，當年都唔夠香港打，一九五八年亞運會，香港球員以「中華民國」名義出戰，仲贏埋冠軍。但自從佢退出球壇後，香港足運就一落千丈。金勞詹話港足搞到排名得番一百六十八，香港足球總會同政府都要負責，無理由佢一唔喺度，班球員就唔識踢波。
現時足總主席梁孔德，正係立法會議員梁劉柔芬嘅老公，金勞詹今次矛頭直指足總，怕唔怕梁劉柔芬唔高興呢？佢就話自己提出呢條質詢，對得住天地良心，唔想見到足總淪為「私家會所」，為咗港足前途先咁做喎。