政情：區選票王擺80圍娶妻
今屆區議會選舉攞到接近四千八百票嘅北區區議員劉國勳，喺榮登票王同順利連任之後，等住佢嘅將會係另一項人生大事，明年二月就會同女朋友、即係同屬新界青年聯會嘅呂迪明（Dikming）共諧連理。呢對政壇金童玉女近日忙住買婚禮用品，皆因兩位之前都忙選舉，搞到依家先至有時間籌備婚禮。
劉國勳同準劉太尋日特登去到太子一個專賣結婚用品嘅商場掃貨，Dikming同我哋講，依家大部分準備工作都係由佢負責，好似場地布置裝飾同流程，就係由佢呢位香港演藝學院畢業生負責，佢好有信心搞到個宴會冇悶場，個個嘉賓都開開心心。
至於劉國勳責任就更加重大，負責制訂八十席、人數超過八百人嘅嘉賓名單，呢項咁浩大嘅工程由佢負責，聽落好似冇乜嘢，做落就知唔容易，淨係研究要請乜人已經好花時間，尤其佢兩位都從事地區工作，真係請漏邊個都唔好意思，所以寧願花多少少時間都唔好馬虎喎。