政情：林D9忽然為藝術折腰
自從林瑞麟（林D9）因為做咗政務司司長而忽然做埋西九文化區董事局主席後，佢為咗沾染藝術氣質，不時都會去吓文藝活動。尋日佢就去咗藝術中心，參觀由中心舉辦嘅當代視覺藝術展，內裏有唔少裝置藝術，林D9為咗參觀其中一件藝術品，不惜彎晒腰，仲彎住腰行咗兩層樓，足足有幾分鐘。
「捐」不織布「冰洞」
尋日陪同林D9參觀展覽嘅，仲有西九文化區行政總裁連納智。佢哋捐咗入去一個類似「冰洞」一樣嘅裝置藝術品裏面，睇嚟險象環生，林D9唔知有無撞親個頭呢。不過唔使驚，整個「冰洞」由不織布做成，唔會撼親，不過要彎腰行幾分鐘，可能有啲腰痠骨痛。不過如果煲呔曾嚟就唔驚嘞，佢身材較矮，點使彎腰？