政情：煲呔曾死撐金融泡沫
世界金融泡沫自從○八年畀金融海嘯篤破後，歐美等國嘅大趨勢都講緊金融體制「去槓桿化」，減少製造金融泡沫，要重回工業、製造業等經濟實業之路。但偏偏有人要同世界脫軌，呢個就係煲呔曾。煲呔曾尋日喺一個經濟峰會上，先話香港要發展六大產業，但去到尾就露出心底嗰句，話香港要繼續大搞金融業，因為其他產業都好難向高增值發展，又講明香港唔使平衡發展產業。煲呔曾咁講法，即係擺明向金融霸權繼續開綠燈。
煲呔曾喺論壇前半段，的確有話香港要發展六大產業，兼且要配合國家十二•五規劃等政策，繼續推動航運、物流等產業發展。但點樣發展法，煲呔曾就無講到，去到論壇中間，煲呔曾就開始露底，猛咁讚香港嘅金融產業發展好犀利，例如開拓到金磚四國市場，在港人民幣結算業務亦發展得愈來愈成熟。
不過煲呔曾愈講愈興奮，開始力挺金融產業，佢話喺金融海嘯後嘅數字顯示，製造業、進出口業等屬「衰得快，復甦得慢」嘅行業，相反金融產業就「抗跌力」強，不論生產總值同職位數字，都未有受到海嘯衝擊，咁講咪即係踩其他行業，抬高金融業囉。點知煲呔曾仲繼續講，話香港未來發展，要靠晒金融產業呢類第三產業高增值行業喎。
講到最尾，煲呔曾仲話過去有種講法，認為香港應該平衡發展產業，點知煲呔曾直斥呢種想法係「不合時宜」，因為唔係樣樣行業都啱高增值。佢又話金融業仍然有好大市場，因為香港背靠祖國，內地城市化每提高一個百分點，就多咗千幾萬城市人口，呢啲新增人口，全部都係目標市場。如此醉生夢死迷信金融泡沫，好彩佢任期好快就完啫。
不分是非幫鬍鬚曾補鑊
煲呔曾「好兄弟」財政司司長曾俊華，近日話有可能會調低額外印花稅，以減輕打擊炒樓力度，隨即畀人鬧佢舉棋不定，煲呔曾尋日即刻為好兄弟補鑊，話政府有需要時，的確會檢討打擊炒樓政策，但現階段根本無啟動到呢個機制，佢仲踩多傳媒一腳，話呢啲消息只係部分傳媒捕風捉影，作揣測性嘅報道。但其實鬍鬚曾唔係咁講法，記者又點會咁寫呀。