中環出更：鍾志平敷死海泥瞬間回春
工業總會主席鍾志平（Roy）熱愛異國文化，早前帶隊考察以色列。呢個地方算係熱門旅遊勝地，但阿Roy一直未有時間去，今次公幹兼旅遊，一舉兩得。
考察生物科技
一行十多人直闖以色列，當地氣氛無想像中緊張，阿Roy話，當地太平到極，連保鏢都唔使請。到底以色列有乜商機值得發掘？原來當地生物科學技術發展成熟，商機處處，阿Roy帶隊參觀多間生物科技公司，大開眼界。考察完畢，眾人爭取機會四圍逛，當然唔少得到訪世界聞名嘅死海。阿Roy換上泳褲跳入死海，將死海泥搽滿身，變成「泥漿人」。
阿Roy話，講都唔信，死海泥敷完一陣，成身又白又滑，睇落後生晒，認真神奇。不過係人都知，死海鹽分超高，頂多浸廿分鐘，否則皮膚會有刺痛感覺，所以阿Roy玩咗一陣就上岸嘞。之後眾人拉隊大擦以色列美食，雖然係煎炸嘢多，但相當滋味喎。