壹傳媒旗下免費報紙《爽報》誨淫誨盜，呢家嘢係人都知，否則都唔會出現「反爽報色情資訊行動」，積極呼籲罷看罷取罷入屋，藉此表達市民憤怒喇。之但係有一家嘢大家未必知，就係政府其實有權直接檢控，可惜至今棄權不用。
嗱，就咁，商務及經濟發展局回覆立法會教育事務委員會嘅信件指出，考慮到淫審處過往評級，以及公眾非常關注《爽報》刊載不雅物品對青少年產生不良影響，影視處如果發現《爽報》明顯違反《淫褻及不雅物品管制條例》，並故態復萌，會考慮加強執法，向有關出版商直接檢控，而不會事先將有關物品交淫審處評定類別，以確保檢控行動更快捷。簡單咁講，對於一個案底纍纍嘅積犯，影視處有權不送審即檢控。淫審處審裁委員張民炳就話嘞，法律冇訂明必須將物品送交淫審處評級先至可以檢控，只要影視處憑專業判斷認為物品屬於第二類不雅，已經可以直接檢控，再由刑事法庭交由淫審處裁決及量刑。
喂，淫賤黎旗下壹淫媒所有刊物絕對係證據確鑿嘅長期積犯啦，總計案底累積一百一十六次，你都咪話唔喪心病狂。至於最近獻世嘅《爽報》，宣淫能力更加係青出於藍勝於藍，出版咗未夠三個月之嘛，已經有二十三次被評為第二類不雅。好嘞，影視處既然有權直接檢控，因乜事幹將一把尚方寶劍束之高閣？點解唔攞把劍去斬妖除魔呢？原因非常之咁明顯，包庇囉，縱容囉，姑息養奸就係咁解。
香港回歸之後，港英餘孽仍然左右大局，當然將沆瀣一氣嘅淫賤黎照顧得無微不至啦。違例犯罪百幾次，次次都係輕輕放過，最重嗰次都係罰款五萬元咁大把，你話唔係包庇縱容都冇人信。反而咯喎，選擇性針對東方報業集團就不遺餘力。好似○五年咁吖，《東方日報》同《太陽報》刊登一輯外國女星Kelly Brook沙灘性感照，經打格仍被評為第二類物品，之但係《蘋果日報》刊登同一輯照片，僅僅被評為第一類非不雅，而香港有售嘅外國雜誌《NOW》刊出同一輯照片，冇打格又冇封套，竟然送審都唔使，反映淫審處同影視處係三重標準。
講到選擇性針對東方，簡直離譜到匪夷所思。九四年《東快訊》刊登一則出現著名藝術品大衞像嘅廣告，哈，淫審處居然評為第二類不雅物品喎，咁嘅野蠻行為令香港淪為國際笑柄。
全國政協委員劉夢熊就講得啱嘞，特區政府司法部門仍然停留於殖民地思維，一方面寬待壹淫媒，另一方面將東方視作眼中釘。
有冇辦法撥亂反正呢？當然有啦，一係吊銷牌照，一係拉人坐監。問題係，港英餘孽點會捨得劏咗自己隻狗吖！