政情：阿Paul心思思空降港島
泛民主派喺區議會選舉大敗，食髓知味嘅建制派密謀再下一城，據聞已暗中開始為明年立法會選舉部署擺位。據聞有「法律超人」稱號嘅謝偉俊（Paul），最近被積極游說由旅遊界功能界別轉戰地區直選，最新建議係落戶港島區，矛頭直指因外傭居港權官司而聲名狼藉嘅公民黨（公文袋）。港島區未正式開戰已經烽煙四起，相信屆時必定上演一場大混戰。
本身係律師嘅阿Paul，○八年攻陷一直為自由黨橋頭堡嘅旅遊界，喺外界不被睇好嘅情況下一鳴驚人當選，自此各界特別係建制派對佢刮目相看。事實上過去三年，阿Paul儼如建制派一員悍將，不時同泛民議員就議事規則等惹火議題唇槍舌劍，同時又為旅遊界出謀獻策，不時為業界出頭同政府據理力爭，因而得到業界唔少好評，更被建制派視為自己友。
據聞有建制派中人睇中阿Paul「偏向虎山行」嘅性格，建議佢由旅遊界轉戰地區直選。其實早前盛傳阿Paul有意循九龍東出選，但經分析五區嘅選情後，認為阿Paul落戶港島區「搶灘」更划算，除咗會增加到七席外，主要係公文袋因外傭居港權官司元氣大傷，全取兩席嘅機會大減，二來上次掹車邊當選嘅公民起動何秀蘭，亦勢必遭到有意捲土重來嘅勞永樂同曾健成「拉後腿」，如果阿Paul以鮮明嘅中產專業人士出選，絕對有機會當選。
有白姐姐做樁腳
究竟阿Paul嘅個人取態如何呢？據聞佢仲未有最後決定，但聽得出佢對落戶港島區「心思思」，因為佢嘅另一半白姐姐啱啱喺區選勝出，反映佢哋嘅政治取態喺中產選區有一定叫座力，白姐姐亦勢必成為阿Paul最堅實嘅地區樁腳。相反阿Paul喺九龍東冇人冇物，亦要慎防因為區選大敗而辭任社民連主席嘅陶君行，隨時以哀兵姿態大舉反撲。究竟阿Paul最後情歸何處，相信好快就會揭盅！